![«Բուլլինգից ազատ դպրոց» ծրագիրն ամփոփվեց գրքի շնորհանդեսով ու նկարների ցուցահանդեսով «Բուլլինգից ազատ դպրոց» ծրագիրն ամփոփվեց գրքի շնորհանդեսով ու նկարների ցուցահանդեսով](https://liberalinstitute.am/wp-content/uploads/2024/07/Bogossi-6-1024x683.jpg)
«Բուլլինգից ազատ դպրոց» ծրագիրն ամփոփվեց գրքի շնորհանդեսով ու նկարների ցուցահանդեսով
Հուլիսի 3-ին, Թուֆենկյան հյուրանոցում, տեղի ունեցավ նշանակալից միջոցառում՝ նվիրված երեխաների հոգեբանական բարեկեցությանը և անվտանգ ուսումնական միջավայրի ստեղծմանը:
«Լիբերալ քաղաքականության ինստիտուտ» ՀԿ֊ն՝ համագործակցելով ՀՀ֊ում Նիդեռլանդների թագավորության դեսպանատան և «Հանրապետական մանկավարժահոգեբանական կենտրոնի» հետ, ներկայացրեց «Փափուկ հմտությունների զարգացումը որպես բուլինգի կանխարգելման և հաղթահարման գործոն» ձեռնարկը:
Միջոցառման ընթացքում տեղի ունեցավ նաև դպրոցականների նկարած «Պատկերենք բուլլինգը» նկարների ցուցադրություն: Ցուցադրված ավելի քան 30 նկարը արտացոլում էին երեխաների պատկերացումները հանդուրժողականության, փոխըմբռնման և բուլինգի վերաբերյալ: Լավագույն երեք աշխատանքների հեղինակները կպարգևատրվեն ցուցահանդեսի ավարտին։
Բացման խոսքով հանդես եկան Լիբերալ քաղաքականության ինստիտուտի նախագահ Տաթևիկ Մատինյանը, ՀՀ–ում Նիդեռլանդների թագավորության Արտակարգ և լիազոր դեսպան Ն.Գ. պարոն Յապ Ֆրեդերիքսը և Հանրապետական մանկավարժահոգեբանական կենտրոնի տնօրեն Լիլիթ Մնացականյանը:
Նրանք կիսվեցին իրենց տեսլականով և հույսերով ծրագրի վերաբերյալ:
Միջոցառմանը ներկա էին ուսուցիչներ, աշակերտներ և ինստիտուտի ներկայացուցիչներ, ովքեր բարձր գնահատեցին բուլինգի դեմ պայքարի և դպրոցներում առողջ մթնոլորտի ստեղծման կարևորությունը:
Ծրագրի շրջանակում պետական և մասնավոր դպրոցներում հետազոտություններ են իրականացվել. նպատակը՝ բարձրացնել իրազեկվածությունը, հրավիրել հանրային ուշադրությունը բուլինգի դրսևորման նկատմամբ և մշակել գործիքակազմ բուլինգի դեմ պայքարի համար:
Սոցիոլոգները հետազոտություն են իրականացրել դպրոցներում՝ բացահայտելու երեխաների շրջանում բուլինգի դրսևորման ձևերը: Այս նախաձեռնությունը կարևոր քայլ է Հայաստանի կրթական համակարգում փափուկ հմտությունների զարգացման և բուլինգի կանխարգելման ուղղությամբ։ Այն կնպաստի երեխաների համար անվտանգ և ներառական միջավայրի ստեղծմանը:
Ծրագրի արդյունքում մշակված ձեռնարկը ԿԳՄՍ նախարարության կողմից երաշխավորվել է որպես ուսումնական նյութ:
Ձեռնարկի և հետազոտության օրինակները հասանելի են այս հղմամբ։
—–
Ծրագիրն իրականացրել է Լիբերալ Քաղաքակլանության Ինստիտուտը, ՀՀ֊ում Նիդերլանդների Թագավորության դեսպանատան աջակցությամբ։